Ekstremvêr i Skandinavia får same namn
Ekstremvêra let seg ikkje stoppe av landegrensene, og Meteorologisk institutt (MET) har derfor laga ei felles namneliste saman med våre kollegaer i Sverige og Danmark.
Frå 1. januar 2026 blir den nye lista tatt i bruk. Lista startar med eit jentenamn på A, og deretter blir det annakvart gutte- og jentenamn oppover i alfabetet. Dei tre meteorologiske institutta (MET, SMHI og DMI) foreslo kvar si namneliste, og namna blei så kombinerte ved loddtrekking. Heile lista kan du lese i botnen av saka.
MET har namngitt ekstremvêr sidan 1994, og det var nyttårsorkanen på Nordvestlandet i 1991/1992 som utløyste behovet. Du kan lese meir om dette på met.no.
Så langt har kvart land i Stormgruppe Nord, som består av Danmark, Sverige og Noreg, hatt sine eigne namnelister. Den felles europeiske organisasjonen EUMETNET (eit nettverk og samarbeid mellom 33 meteorologiske og hydrologiske tenester i Europa), har retningslinjer som seier at kvar stormgruppe skal ha ei felles offentleg namneliste.
Kriteria for å sende ut ekstremvêrvarsel er noko ulike i dei tre landa. Danmark namngir stormar når middelvinden overstig 25 m/s, medan Noreg brukar konsekvensbasert varsling og kan sende ut ekstremvarsel for fenomen som vind, regn, snø og vassstand. I Sverige namngir SMHI vêr som er venta å gi store konsekvensar for samfunnet, som stormar, kraftig snøfall og snøfall i kombinasjon med vind, samt regn som kan føre til omfattande flaum.
Ikkje lenger hemmeleg
MET si namneliste har vore hemmeleg, men blir no offentleg tilgjengeleg.
– Vi er faktisk dei siste i Europa som har hemmeleg liste, seier METs vêrvarslingsdirektør Bård Fjukstad.
Han seier at den felles namnelista vil gjere kommunikasjonen mellom dei tre landa og resten av Europa enklare.
– Av og til kan det òg kome eit ekstremvêr som allereie har fått namn utanfor Skandinavia, og då adopterer vi dette namnet i staden for å bruke vår liste. Dette skjedde under “Amy”, som var det førre ekstremvêret. Om det ikkje kjem ekstremvêr før nyttår, kan vi altså få to jentenamn på A etter kvarandre, seier Fjukstad.
Slik ser den nye lista ut:
- A: Anna
- B: Bjørn
- C: Cecilia
- D: Daniel
- E: Elena
- F: Filip
- G: Gunilla
- H: Hugo
- I: Ida
- J: Johan
- K: Karin
- L: Lukas
- M: Miriam
- N: Noah
- O: Olivia
- P: Pelle
- R: Ronja
- S: Sture
- T: Tonje
- U: Urban
- V: Vilma
- Y: Ymer