Historisk mild vinter
Gardermoen vil for første gong oppleve at gjennomsnittstemperaturen for vinteren er over null grader. Det klassifiserer ikkje til vinter i meteorologien. En vinterdag blir nemleg definert som ein dag med gjennomsnittstemperatur under null grader.
Mildaste vinter i åtte fylke
I åtte fylke blir det sett rekordar: Innlandet, Viken, Oslo, Vestfold og Telemark, Agder, Rogaland, Vestland og Trøndelag. Nøyaktig kor høg gjennomsnittstemperaturen på desse stadane var i desember-februar veit vi først når februar månad er over. Likevel har desse stadene hatt ein så høg gjennomsnittleg temperatur hittil, at vi allereie kan slå fast at dei har hatt den mildaste vinteren sidan målingane starta. Vi har berre sett på målestasjonar som har vore i drift i meir enn 30 år.
I vinter har det passert mange lågtrykk frå sørvest. Dei har med seg mild sjøluft, noko som har ført til høge temperaturar i Sør-Noreg.
Varmerekordane aukar
– Vi har milde vintrar med mykje lågtrykksaktivitet og høge temperaturar frå tid til annan, men det har aldri vore så mildt som i år, seier Reidun Gangstø Skaland, klimaforskar ved Meteorologisk institutt.
Dei milde vintrane blir enda mildare enn dei hadde vore utan klimaendringar, i tråd med prognosane for klimaet i framtida.
– Ein einskildvinter kan ikkje knytast direkte til klimaendringane, for vi vil alltid ha naturlege variasjonar. Neste vinter kan bli veldig kald. Men vi kan slå fast at vi får stadig fleire varmerekordar, medan kulderekordar blir sjeldnare. I 2019 blei det til dømes sett 159 varmerekordar, men berre 50 kulderekordar. Aukinga i varmerekordar over tid skuldast den globale oppvarminga, seier Skaland.
Oslo
Både på Blindern og Tryvannshøgda blir vinteren rekordmild. Målingane går attende til høvesvis 1937 og 1943. Vi har aldri før målt så få vinterdagar på Blindern i Oslo som denne sesongen, og for første gong blir gjennomsnittstemperaturen i både desember, januar og februar over null grader. Blindern har heller aldri før i ein vinterperiode målt så få dagar med fem kuldegrader eller meir, og vi har heller aldri målt så få dagar med målbare snødjupner.
Viken
Her har Gardermoen, Rygge og Asker registrert sin mildaste vinter nokon gong, med måleseriar attende til 1940- og 50-tallet. Gardermoen vil for første gong ha ein gjennomsnittstemperatur på over null grader, og har altså ikkje hatt vinter så langt i år.
Innlandet
I Innlandet fylke blir det sett sju rekordar. Målestasjonane på Dovre, Drevsjø, Kise på Hedmark, Austre Toten, Lillehammer, Vest-Torpa og Fagernes set alle rekord for høgaste gjennomsnittstemperatur i vinterperioden.
Vestfold og Telemark
To stasjonar i fylket set rekord: Melsom og Færder fyr, sistnemde med ein måleserie heilt attende til 1885.
Agder
I Agder set fem målestasjonar rekord. Oksøy fyr har målingar attende til 1876, og årets vinter blir den varmaste sidan den gong. Det same gjeld Torungen fyr, som har vore i drift sidan 1867. Også Landvik, Lindesnes fyr og Lista fyr set rekord.
Rogaland
På Vestlandet har det vore den mildaste vinteren nokon gong på Sola og på Utsira fyr. Sistnemde har målingar frå 1867.
Vestland
Her blir det sett rekordar på Slåtterøy fyr, Takle i Gulen og på Ytterøyane fyr. Det er òg mogleg stasjonane Flesland og Florida i Bergen klarar å slå rekorden frå vinteren 2013/14, men mest sannsynleg gjer dei ikkje det.
Trøndelag
I Trøndelag fylke blir det sju rekordar for mildaste vinter: Sula, Snåsa, Ørland, Halten fyr, Buholmråsa fyr, Nordøyan fyr og Sklinna fyr set alle rekordar. Nordøyan fyr har målingar attende til 1900.
Berekningane av rekordane er basert på data fram til 25. februar. Dei endelige tala for februar er klare måndag 2. mars kl. 12:00.