Kan hindre ein ny Titanic

Mindre sjøis gjer delar av Arktis lettare tilgjengeleg. Det er førebels mest utskiping av råvarer som fisk, metall og tømmer, men også cruiseturismen har auka. Når isen smeltar aukar samstundes faren for isfjell som kjem frå smeltande og kalvande isbrear. 

—  Målingane våre kan bidra til betre varsling av is og isflak i området. Isfjell kan gjere stor skade på farty, og boksane våre er laga for å oppføre seg som isfjell. Om vi kan simulere korleis dei bevegar seg, blir det lettare å varsle når isfjell kan utgjere fare, seier Martina Idzanovic, forskar ved Meteorologisk institutt.

Avansert flaskepost

Dei veg under eit kilo og måler vel 10 cm. Dei ser kanskje unnselege ut, men boksane er skreddarsydd for oppdraget.

— Eg bygde 15 boksar før avreise, og det var stor spenning knytt til om dei i det heile ville flyte! Men 12 av dei er no i drift og sender oss data annankvar time om bølgjene og straumane i havet, fortel Idzanovic.

Dei neste seks månadene flyt dei rundt i Barentshavet og ved iskanten i Framstredet. Dei bevegar seg langs norskekysten, den russiske grensa og dei kan ende på Svalbard. Dei kan også fryse fast på isflak og dermed bevege seg enda lengre. På kartet fyl Idzanovic med på rørslene dag for dag.

— Det er veldig tilfredsstillande å sjå at dei fungerer så godt. Dei har allereie bevega seg fleire hundre kilometer og fungerer som avanserte flaskepostar.

Mindre is aukar faren

Toktet var ein del av forskingssamarbeidet CIRFA, leia av Universitetet i Tromsø, som har som mål å overvake og varsle tilhøva i Arktis. Når sjøisen smeltar som følgje av klimaendringane blir nye område tilgjengelege for skipstrafikk, men det kan vere risikofylt.

—  Gode sjø- og isvarsel er avgjerande for å planlegge trygge reiser gjennom Arktis, men det er også viktig ved potensielle oljelekkasjar eller redningsaksjoner, seier Idzanovic.