Regjeringa satsar på Polhavet 2050 – gir ein milliard til forskingssamarbeid
Roar Skålin, direktør ved Meteorologisk institutt, er nøgd med statsministeren sine gode ord om prosjektet og lovnadar om å støtte forsking i nordområda og Arktis under pressekonferansen ved UiT 26. august.
– Veldig gledeleg at regjeringa no bekrefta at Polhavet 2050 blir finansiert, seier han.
– MET ser fram til å bidra i det viktige tverrfaglege samarbeidet om kunnskapen kring endringane i Arktis.
Meteorologisk institutt er stolte av å vere ein del av polarforskinga sitt landslag og bidra inn i det tverrfaglige kunnskapsgrunnlaget om Arktis.
– For oss blir Polhavet 2050 også ein viktig komponent til vårt bidrag for det femte internasjonale polaråret (IPY) 2032-2033.
Frå kvitt til blått hav
"Polhavet er i endring og skiftar farge frå kvitt til blått", sa statsminister Støre under pressekonferansen, og peika på at eit isfritt polhavsområde er ein sikkerheitsrisiko.
Polhavet vil vere isfritt innan sommaren 2050. Konsekvensane av eit isfritt Polhav er ukjend, men truleg store. Eit ope Polhav vil gi auka ferdsel og aktivitet frå fleire nasjonar, skriv regjeringa i pressemeldinga si.
For meir, sjå denne pressemeldingaom Polhavet 2050 og UiT.
Om Polhavet 2050
Polhavet 2050 er eit stort, tiårig forskingsprogram (2026–2036) som vil involvere heile breidda av relevante forskingsmiljø og samle polarforskarar frå 18 norske universitet og institutt. Programmet vil dekkje fagfelt frå dei djupaste havbotnane til øvre atmosfære.
I heile tiårsperioden vil Polhavet 2050 sikre langsiktig og aktiv tilstadeværelse i arktiske havområde frå eit stort tal norske institusjonar. Isbrytaren FF Kronprins Haakon blir sentral infrastruktur.
Polhavet vert endra fundamentalt som følgje av klimaendringane. Innan dei neste 25 åra vil sommaris i Polhavet vere ein saga blott. Med denne synlege endringa kjem også andre endringar til som kan vere av kritisk karakter som ikkje er like synlege. Denne omveltinga av Polhavet har avdekka at kunnskapen vi har ikkje er nok.
Med eit nytt polhav melder det seg eit behov for ny kunnskap og innsikt om endringar, korleis dei verkar saman og koplar seg til område lenger sør.
Det er forskarane bak dei tidlegare, no utfasa, polarsatsingane Arven etter Nansen og GoNorth som har gått saman i eit felles konsortium, som vil gjennomføre dette forskingsprogrammet.
Desse deltek i Polhavet 2050
Norges arktiske universitet (UiT) (styreleder)
Fridtjof Nansens institutt (FNI)
Universitetet i Bergen (UiB)
Norges teknisk-, naturvitenskapelige universitet (NTNU)
Universitetet i Oslo (UiO)
Norsk polarinstitutt (NP)
Havforskningsinstituttet (HI)
Meteorologisk institutt (MET)
Stiftelsen Nansen Senter for miljø og fjernmåling (NERSC)
Akvaplan-niva
Forsvarets forskningsinstitutt (FFI)
Norges geologiske undersøkelser (NGU)
Forskningsinstituttet NORCE
Norsk utenrikspolitisk institutt (NUPI)
Universitetssenteret på Svalbard (UNIS)
SINTEF
Norsk institutt for naturforskning (NINA)
Forskningsstiftelsen NORSAR